தனியார் கல்வி நிறுவன பயங்கரங்கள் - ஓர் அலசல்

தமிழ்நாட்டில் உள்ள தனியார் பொறியியல் கல்லூரிகளில் கல்விக் கட்டணத்தை உயர்த்தி நிர்ணயிக்க வேண்டும் என்ற கோரிக்கை, இந்தக் கல்வி ஆண்டின் தொடக்கத்தில் முன்வைக்கப்பட்டு, இது தொடர்பாக பேச்சுவார்த்தைகள் நடத்தப்பட்டன என்றாலும், இது குறித்து அரசு எந்த முடிவையும் எடுக்காமல் தள்ளி வைத்தது.

இதுபோன்ற பிரச்னைகளைக் கல்லூரியில் மாணவர் சேர்க்கை நடத்தும் நேரத்தில் கல்வி நிறுவனங்கள் எழுப்புவதும், அரசும் இந்தப் பிரச்னையை ஏனோதானோ என்று முடித்துவிடவும், ஓரளவு உயர்த்திக்கொள்ள அனுமதிப்பதுமாக இருக்கிறதே தவிர, இதனை ஆறு ஏழு மாதங்களுக்கு முன்பாகவே விவாதித்து, முடிவுகள் எடுக்க வேண்டும் என்று நினைப்பதே இல்லை.

இதனால் அரசுக்கோ அல்லது தனியார் கல்லூரிகளுக்கோ பெரிய இழப்பு இல்லை. பொருளிழப்பும் அதே நேரத்தில் மனஉளைச்சலும் மாணவர்களுக்கும் பெற்றோருக்கும்தான் ஏற்படுகின்றன.

கல்விக் கட்டணம் சாதாரண மக்களின் வாழ்க்கையில் மிகப்பெரும் சுமையாக இருக்கிறது என்பது ஒவ்வொரு குடும்பத்தினரும் உணரக்கூடியதுதான். அது மழலையர் பள்ளி என்றாலும், மருத்துவக் கல்லூரி அல்லது தொழில்நுட்பக் கல்லூரி என்றாலும் அபரிமிதமான கட்டணமாகவே இருக்கின்றன.

இந்தச் சுமையைக் குறைக்க வேண்டியது அரசின் மிகப்பெரும் கடமை. இந்தச் சுமையை இரு வழிகளில் குறைக்க முடியும். ஒன்று, கல்லூரிகளின் கட்டணத்தை அதன் தரத்துக்கு ஏற்ப குறைப்பது. இரண்டாவது, மாணவர்களின் "கட்-ஆப்' மதிப்பெண்களுக்கு ஏற்ப கட்டணத்தை நிர்ணயிப்பது.

தற்போது தனியார் கல்லூரிகள் அனைத்திலும் ஒரே விதமான கட்டணம் வசூலிக்கப்படுகின்றன. கலந்தாய்வின் கடைசிநாள் வரை இடங்கள் காலியாக இருக்கும் கல்லூரியின் கல்விக் கட்டணமும், முதல் நாளிலேயே இடங்கள் நிரம்பிவிடுகிற கல்லூரிக்கும் ஒரே விதமான கல்விக் கட்டணத்தைத்தான் அண்ணா பல்கலைக்கழகம் தீர்மானிக்கும் என்றால், கல்வியின்  தரத்தைப் பற்றி பல்கலைக்கழகம் அல்லது அரசின் கருத்துதான் என்ன?

தற்போது வெறுமனே தேர்ச்சிபெற்றிருந்தாலே போதும் என்கிற அளவுக்குப் பொறியியல் கல்விக்கான குறைந்தபட்ச மதிப்பெண் குறைக்கப்பட்டு, அனைவரும் தனியார் கல்லூரியில் சேரும் வாய்ப்பை விரிவுபடுத்திக் கொடுத்திருக்கும் தமிழக அரசு, இந்தக் கல்லூரிகளை ஏன் தரப்படுத்தி, கட்டணத்தை வகைப்படுத்தக்கூடாது?

கலந்தாய்வு தொடங்கிய 5 நாள்களில் எந்தெந்தக் கல்லூரியில் எந்தெந்தப் பாடப்பிரிவுகளில் இடம் நிரம்பி விடுகிறதோ அவர்களுக்கு மட்டும் அதிகபட்சக் கட்டணத்தை வசூலிக்க அனுமதிக்கலாம். அடுத்த 5 தினங்களில் இடங்கள் நிரம்பிவிடும் கல்லூரிகள் அல்லது அக் கல்லூரியின் பாடப்பிரிவுகளுக்கு மட்டும் 20 விழுக்காடு கல்விக் கட்டணத்தைக் குறைக்கலாம்.

இதே போன்று பல அடுக்குகளில் கல்விக் கட்டணம் அமைக்கப்படுமேயானால், மாணவர்கள் பயன்பெறுவதுடன், கல்லூரிகளும் தங்கள் பாடப்பிரிவைத் தரமாக மாற்றி மக்கள் மனதில் இடம்பிடிக்க முயற்சிகள் செய்யும். கல்வியின் தரம் தானே உயரும்.

அல்லது மாணவர்களின் "கட்-ஆப்' மதிப்பெண் அடிப்படையில் கல்விக் கட்டணத்தைத் தீர்மானிக்கலாம். ஒரு மாணவர் "கட்-ஆப்' மதிப்பெண் 190 இருந்தும்கூட, அவர் விரும்பிய பாடப்பிரிவு, அரசுக் கல்லூரிகளில் இல்லை என்பதாலேயே தனியார் கல்லூரியைத் தேர்வு செய்யும் கட்டாயத்துக்குத் தள்ளப்படுகிறார். 

அரசு போதுமான அளவு கல்லூரிகளை உருவாக்காத குற்றத்துக்காக, தனியார் கல்லூரிகளை அனுமதித்திருக்கிறது என்பதற்காக, நன்றாகப் படித்த ஒரு மாணவரும் அதிகபட்சக் கல்விக் கட்டணத்தைச்  செலுத்த வேண்டும் என்பது எந்த விதத்தில் நியாயம்?

இதுபற்றிய முடிவுகளை, மாணவர் சேர்க்கை தொடங்கிய பின்னர் அவசர அவசரமாகக்  கூட்டம் நடத்தித் தீர்மானிப்பதைக் காட்டிலும், இப்போதே இந்தப் பிரச்னையைப் பேசி, மக்களுக்கும் மாணவர்களும் பயன்படும் வகையில் கட்டணத்தைத் தீர்மானிப்பது அரசின் கடமையல்லவா?

நன்றி தினமணி.
 

முந்தைய பதிவுகள்:     1. சினிமா கிசுகிசு மட்டும்தான் படிப்பீங்களா?
                                                  2.  இந்திய வெளியுறவுத் துறை                                                                                                3. இனி சன்டேன்னா சினிமாதான்...

தயவுசெய்து தவறுகளை சுட்டிக்காட்டுங்கள்

நிறைகளை பகிர்ந்துகொள்ளுங்கள்,
பிடித்து இருந்தால் எத்தனை நாளுக்கு பிறகு வாசித்தாலும்

ஓட்டு போட மறக்காதீர்கள்....