நமக்கு இதுவும் வேண்டும். இன்னமும் வேண்டும்...!

எல்லா அத்தியாவசியப் பொருள்களின் விலைகள் மிகவும் கடுமையாக  ராக்கெட் வேகத்தில் உயர்ந்து கொண்டிருக்கும் பிரச்சனை நடக்கும் நாடாளுமன்ற கூட்டத் தொடரை ஒரு கலக்கு, கலக்கிவிட்டது.

இந்த நாடாளுமன்ற கூட்டத் தொடரிலும் சரி,  கடந்த இரு கூட்டத் தொடர்களின்போதும் சரி சாதாரண மனிதர்களை வாட்டி வதைத்திடும் விலைவாசிப் பிரச்சனையை எதிர்க்கட்சிகள் முன்னுக்கு கொண்டு வந்தன. 

சென்ற மழைக்காலக் கூட்டத்தொடரின் போதும் சாமானிய மக்களின் வாழ்க்கை முறையை மிகக் கடுமையாகப் பாதித்துக் கொண்டிருக்கும்  விலைவாசி உயர்வு குறித்து விவாதங்கள் எதுவும் நடத்திட அரசாங்கம் தயாராக இல்லாமல், நாடாளுமன்றத்தை ஒத்தி வைத்தே காலத்தை முடித்தது.

இப்போது நடைப்பெற்றுக் கொண்டிருக்கும் இக்குளிர்காலக் கூட்டத் தொடரின்போதும் இந்த விலைவாசி உயர்வு தொடர்பாக அதே போக்கையே இந்த மன்மோகன் சிங் தலைமையிலான காங்கிரஸ் அரசு செய்துவருகிறது. இந்த அரசு மூன்று முக்கியப் பிரச்சனைகளை சரிவர கவனிக்கவில்லை.

முதலாவதாக விவசாயப் பொருள்கள் மீதான ஊக வர்த்தகத்தை உடனடியாகத் தடை செய்ய வேண்டும். இந்த ஊக வர்த்தகம்தான் அத்தியாவசியப் பொருள்களின் விலைகள் பெருமளவு உயர்ந்திட காரணம் ஆகும் . எனவே இந்த ஊக வர்தகத்தினை உடனடியாகத் தடை செய்ய வேண்டும். 

இரண்டாவதாக அண்மையில் உயர்த்தப் பட்ட பெட்ரோலியப் பொருட்களின் விலைகள் குறைப்பது மிகவும் அவசியம். இந்தப் பெட்ரோலியப் பொருட்களின் விலை உயர்வைத் தொடர்ந்து போக்குவரத்துக் கட்டணங்களும் பெருமளவு  உயர்ந்து அது பண வீக்கத்திற்கும் வழி வகுக்கிறது.

மூன்றாவதாக பொது விநியோக முறை மூலமாக ரேசன் கடைகளில் வறுமைக்கோட்டுக்குக் கீழேயுள்ள மக்களுக்கு அரசின் மத்திய உணவுக் கிடங்குகளில் வீணாகிக் கொண்டிருக்கும் உணவு தானியங்களை விநியோகம் செய்ய அரசு உடனடியாக நடவடிக்கை எடுத்திட வேண்டும். 

இதையெல்லாம் கவனிக்காமல் நமது நிதியமைச்சர் பணவீக்கம் நமது இந்தியாவில் சரியாகிக் கொண்டிருக்கிறது என்று சொல்லுகிறார். நிச்சயமாக ஒன்று இந்த காங்கிரஸ் அரசு மக்களின் வாழ்க்கை நிலையைப் பார்க்காது கண்ணை மூடிக்கொண்டு குருடாக இருக்க வேண்டும் அல்லது விலை வாசியை உயர்த்தி அதை நியாயப்படுத்துவதற்காக பேட்டிகள் அளித்துக் கொண்டிருக்க வேண்டும்.

நமக்கு இதுவும் வேண்டும். இன்னமும் வேண்டும், இவர்களை ஆட்சியில் அமர வைத்ததற்கு இன்னும் என்னவெல்லாம் செய்யப் போகிறார்களோ?