தோழி.. நீ செய்தது மட்டும் நியாயமா?

மனதில் உள்ள

மொத்தத்தையும்

சொல்ல முடிவதில்லை

பிரிவுகள் நிறைந்த

எந்த பயணத்திலும்..

விடைப் பெற்றுக்கொண்ட

சிறிது கணம் கடந்தே

ஞாபகத்திற்கு வரும்

மறந்து போனவைகளின்

கடைசி ரேகை...

நீண்ட பயனத்துக்காய்

குமுதமும், விகடனும்,

மினரல் வாட்டரும் 

வாங்கி வந்த

உன் கைகளைப் பற்றிக்கொண்டு

வெகுநேரம் பேசியப் பின்பு

இம்முறையும் நிகழ்ந்தது

ஞாபகம் வராதவைகளின் ஞாபகம்...

யாருக்கு தெரியும்

நான்கு பேர் சுமந்து செல்கையில்

புதைந்து கிடக்கலாம்

நெஞ்சு குழிக்குள்

வெகுநாளாய் சொல்ல நினைத்த

ஏதாவதொன்று...