அடுத்த ஐந்து ஆண்டுகளில் இந்தியா இதில்தான் முதலிடம் - ஒரு அதிர்ச்சி ரிப்போர்ட்

சீனாவின் முன்னேற்றத்தை ஒப்பிடும் போது, நாம் இன்னும் பின்தங்கிய நாடாகவே இருக்கிறோம் எனத் தோன்றுகிறது. பல துறைகளிலும், அபரிமிதமாக முன்னேறி வருகிறது சீனா. 

உலக ஒலிம்பிக் போட்டி, ஆசிய விளையாட்டுப் போட்டிகளில், சீனா சிறப்பாக விளையாடி வருகிறது. ஆனால், ஒரு தங்க மெடல் வாங்கவே இந்தியா திணறுகிறது. 

இப்போது, டென்னிஸ் விளையாட்டிலும், சீனா முன்னேறி வருகிறது. ராணுவத்தில், நம்மைவிடப் பல மடங்கு சக்தி வாய்ந்ததாக, சீனா வளர்ந்துள்ளது. பொருளாதாரத்தில், ஜப்பான், அமெரிக்காவுடன் போட்டி போடும் அளவு, பல மடங்கு உயர்ந்து கொண்டே போகிறது. 

கல்வி முறையில், ஆரம்பம் முதல், பட்டப்படிப்பு வரை, கட்டுக் கோப்பாக முன்னேறி வருகிறது. சமீபத்தில் சீனா, பீஜிங்கிலிருந்து, ஹாங்காங் வரை, 1,318 கி.மீ., தூரத்தை, ஐந்து மணி நேரத்தில் கடக்கும், உலகிலேயே அதிவேக புல்லட் ரயிலை அறிமுகப்படுத்தி, புகழ் பெற்றிருக்கிறது. இங்கோ, ரயில் தண்டவாள விரிசலைக் கூட உடனடியாக சரிப்படுத்த முடியாத நிலையில் நாம் இருக்கிறோம்.

மதுரை - சென்னை இடையே இயக்கப்படும் வைகை அதிவேக ரயில், 120 கி.மீ.,க்கு பரிசோதனை ஓட்டம் செய்து, 100 கி.மீ., வேகத்தில் இயக்க, ரயில்வே பாதுகாப்பு கமிஷனர் அனுமதியளித்தும், 80 கி.மீ., வேகத்தில் தான் இயக்கப்படுகிறது. 

டில்லி - ஆக்ரா இடையே செல்லும், ராஜ்தானி அதிவேக ரயில், 100 - 120 கி.மீ., வேகத்தில் இயக்கப்படுகிறது. மணிக்கு, 260 கி.மீ., வேகத்தில் இயக்கும் சீனாவை, நாம் முந்தப்போவது எப்போது? 

உலகிலேயே, லஞ்ச ஊழலில் முதலிடம் பிடிக்க, இந்தியா வேகமாக முன்னேறி வருகிறது என்பதே நம் சாதனை!

ஒப்பீடு தவறுதான். இருந்தாலும் என்னுடைய ஆதங்கம் இது..
உண்மைதானே உறவுகளே.....