கேப்டன் தோனியை காப்பாற்றுங்கள்!

கேப்டன் தோனியை தடையில் இருந்து காப்பாற்றும் பெரும் பொறுப்பு இந்திய பவுலர்களுக்கு உள்ளது. அடுத்து நடக்க உள்ள வெஸ்ட் இண்டீசுக்கு எதிரான மூன்றாவது டெஸ்டில் குறிப்பிட்ட நேரத்துக்குள் பந்துவீசி முடிக்க வேண்டும்.
 

வெஸ்ட் இண்டீஸ் சென்றுள்ள இந்திய அணி, மூன்று போட்டிகள் கொண்ட டெஸ்ட் தொடரில் பங்கேற்று வருகிறது. முதல் இரண்டு டெஸ்ட் போட்டிகளின் முடிவில் இந்திய அணி 1-0 என முன்னிலையில் உள்ளது. இதில், இரண்டாவது டெஸ்ட் போட்டியின் கடைசி நாளில், குறிப்பிட்ட நேரத்துக்குள் 3 ஓவர்கள் வரை குறைவாக வீசிய குற்றத்துக்காக, கேப்டன் தோனி மற்றும் வீரர்களுக்கு அபராதம் விதிக்கப்பட்டது.
 

ஏற்கனவே, தென் ஆப்ரிக்காவுக்கு எதிரான கேப்டவுன் டெஸ்டில், தாமதமாக பந்துவீசிய குற்றத்துக்காக, கேப்டன் தோனிக்கும் சக வீரர்களுக்கும் அபராதம் விதிக்கப்பட்டது. ஐ.சி.சி., விதிப்படி,ஒரே ஆண்டுக்குள் மூன்று போட்டிகளில் தாமதமாக பந்துவீசும் அணியின் கேப்டன், அடுத்து வரும் ஒரு டெஸ்டில் பங்கேற்க தடைவிதிக்கப்படும்.
 

இந்நிலையில், நாளை டொமினிகாவில் துவங்கும் வெஸ்ட் இண்டீசுக்கு எதிரான மூன்றாவது டெஸ்டில், இந்திய பவுலர்கள் விரைவாக பந்துவீசி, தோனியை தடையில் இருந்து காப்பாற்ற வேண்டும். இல்லையெனில், வரும் ஜூலை மாதம் துவங்கும் இங்கிலாந்துக்கு எதிரான, லார்ட்ஸ் டெஸ்டில் பங்கேற்க முடியாது. இது சர்வதேச கிரிக்கெட் கவுன்சில் (ஐ.சி.சி.,) சார்பில் நடக்கும் 2000 வது டெஸ்ட். வரலாற்று சிறப்பு மிக்க இந்த டெஸ்டில் தோனியை பங்கேற்க வைக்க வேண்டிய பொறுப்பு, இந்திய அணியின் பவுலர்கள் கையில் தான் உள்ளது.