மடியில் கனம், வழியில் பயம் உண்மைதானே முத்தமிழ் அறிஞரே?

கடந்த, ஐந்து ஆண்டு கால தி.மு.க., ஆட்சியில், தி.மு.க.,வினரால் தங்கள் சொத்து, நிலங்களை பறிகொடுத்து தவிப்பவர்கள் குறித்த செய்திகளை, சட்டசபை எதிர்க்கட்சித் தலைவராக இருந்த, அ.தி.மு.க., பொதுச் செயலரான ஜெயலலிதா நன்கு அறிந்தவர்.



தன் கட்சி, மக்கள் ஆதரவுடன் வெற்றி பெற்று, ஆட்சிக்கு வந்தால், தி.மு.க.,வினரால் மோசடி செய்து, அபகரிக்கப்பட்ட நிலங்களையும், சொத்துக்களையும் மீட்டு, பாதிக்கப்பட்டவர்களுக்கு வழங்க, தன் அரசு நடவடிக்கை மேற்கொள்ளும் என்று அறிவித்தார். அவ்விதமே முதல்வரானதும், தான் சொன்னபடி, நில அபகரிப்பு சம்பந்தமான புகார்களை விசாரித்து, நடவடிக்கை மேற்கொள்ள ஆணை பிறப்பித்தார்.

இதன் விளைவாக, தமிழகத்தின் அனைத்து மாவட்ட காவல் துறை 
அலுவலகங்களிலும், நில மோசடி புகார்கள் குவிந்தவண்ணம் உள்ளன. இதில், தி.மு.க., முன்னாள் அமைச்சர்கள் வீரபாண்டி ஆறுமுகம், கே.என்.நேரு; திருச்சி துணை மேயர் அன்பழகன், மாவட்ட செயலர்கள், கட்சி நிர்வாகிகள், முக்கிய பிரமுகர்கள் என, பலர் மீது புகார்கள் தெரிவிக்கப்பட்டு, காவல் துறையினரால் நடவடிக்கை மேற்கொள்ளப்படுவதை, நாளிதழ்கள் வாயிலாக அறிய முடிகிறது.

இத்தகைய சூழலில், முன்னாள் முதல்வர் கருணாநிதியும், துணை முதல்வர் ஸ்டாலினும், அ.தி.மு.க., ஆட்சி, தி.மு.க.,வினர் மீது அராஜகத்தையும், அடக்குமுறையையும் ஏவி வருவதாகவும், பொய் வழக்குகளை போட்டு அச்சுறுத்தி, கட்சியை அழிக்க ஜெயலலிதா முயற்சித்து வருவதாகவும், குற்றம் சாட்டியுள்ளனர்.

இன்றைய முதல்வர் ஜெயலலிதா மீது, தி.மு.க., ஆட்சிக் காலத்தில், தொடுக்கப்பட்ட வழக்குகள் அனைத்தையும், அவர், கோர்ட்டில் சந்திக்கவில்லையா? இன்றும் அவர் மீது தொடுக்கப்பட்ட சொத்துக்குவிப்பு வழக்கு ஒன்று, பெங்களூரு கோர்ட்டில் நடந்துக் கொண்டிருப்பது தி.மு.க.,வினருக்கு மறந்து போய் விட்டதா?


தற்போதைய அரசு, தி.மு.க.,வினர் மீது, போடும் வழக்குகள் அனைத்தும், பொய்யானது என்று கூறும் முன்னாள் முதல்வரும், துணை முதல்வரும், அதை, தம் கட்சியினரை துணிச்சலுடன் எதிர்கொண்டு, தாங்கள் நிரபராதிகள் என்று நிரூபிக்க செய்யலாம்.அரசின் அராஜகம், அடக்குமுறை, பொய் வழக்குகள் என்று புலம்பித் தவிப்பதை பார்க்கும்போது, அச்சப்படுவது போலத் தெரிகிறது.