ஐயையோ எல்லாம் போச்சே பாமக - ராமதாஸ் அலறல்...!

கடந்த சட்டசபை தேர்தலில், தி.மு.க.,வின் குடும்ப அரசியல் காரணமாக, மக்கள் எழுப்பிய எதிர்ப்பாலைகளால், தம் கட்சி கடுமையான தோல்வியைத் தழுவி விட்டதாக, பா.ம.க., தெரிவித்துள்ளது.

 தி.மு.க., தலைமை மீது, தொடர்ந்து குற்றம் சாட்டுவதையே வாடிக்கையாகக் கொண்டுள்ள பா.ம.க., இனிமேல், அ.தி.மு.க.,வையும் எதிர்க்குமாம்! 

இவர்களின் கடந்த கால வரலாற்றில், அ.தி.மு.க., தலைமையை எதிர்க்கும் துணிவுக்கு, ஆதாரம் ஏதுமில்லை. அத்தகு துணிச்சலும், வீரமும் பா.ம.க., தலைவருக்கு இனியேனும் துளிர் விடுமா என்பது சந்தேகமே; அப்படியிருக்கையில், இவர்களை நம்பி, பிற கட்சியினர் எப்படி கூட்டணியில் சேருவர்?

தி.மு.க.,வுக்கு, ஒரு கொள்கை உண்டு; அது, அ.தி.மு.க.,வை எதிர்ப்பது. அ.தி.மு.க.,வுக்கும், ஒரு கொள்கை உண்டு; அது, தி.மு.க.,வை எதிர்ப்பது.

மற்ற கட்சிகளுக்கு, என்ன கொள்கை இருக்கிறது? தேர்தலுக்குத் தேர்தல், தமக்கு முதுகு கொடுத்தவர்களையே எட்டி உதைத்துவிட்டு, அடுத்த முதுகைத் தேடுவதுதானே, இவர்களது வாடிக்கை!

தி.மு.க., தலைமை, குடும்ப அரசியல் நடத்துவது, பா.ம.க.,வின் குற்றச்சாட்டு. 1993ல், வைகோ தொடுத்த கணைதானே அது... அவரே தி.மு.க.,வுடன் கூட்டணியில் சேர்ந்து, தேர்தலை சந்திக்கவில்லையா?

தி.மு.க., தலைமை மட்டும், இப்போது குடும்ப அரசியலை நடத்தவில்லை. நேரு, சாஸ்திரி, சரண்சிங், தேவ கவுடா குடும்பங்கள், மத்திய அரசிலும், பரூக் அப்துல்லா தொடங்கி, புதுவை மாநில வெங்கட சுப்பா ரெட்டியார் வரை, அனைத்து மாநிலங்களிலும், குடும்ப அரசியல்தான் நடக்கிறது; பா.ம.க.,வும், அதைத்தான் செய்கிறது.

தி.மு.க., தலைமை செய்த, அத்தனைக் காரியங்களையும் காப்பியடித்துக் கொண்டிருக்கும் பா.ம.க., தலைமை, கண்ணாடி வீட்டுக்குள்ளிருந்து கொண்டு, கல்லெறியக் கூடாது. 

பா.ம.க., தன் குறைகளைக் களைந்து, பொது வாழ்வில், அனைத்து இன மக்களின் நம்பிக்கையையும் பெருமளவுக்கு, தன் குண நலன்களை மாற்றிக் கொள்ளாதவரை, தி.மு.க., மற்றும் அ.தி.மு.க.,வுக்கு மாற்றாக வளர முடியாது. தே.மு.தி.க., நிலையைக் கூட எட்ட முடியாது. தன் குடும்ப நலனையும், ஒரு சில குறிப்பிட்ட வன்னியர் குழுக்களை மட்டுமே முன்னிறுத்தி, தமிழகத்தில் அரசியல் நடத்த முடியாது என்பதே உண்மை...