நேர்மையில்லாத அரசியல்வாதிகளை குப்பையில் போட

மயிலாசனம், கோஹினூர் வைரம் போன்றவை, நம்முடைய தேசிய சொத்துக்கள். அவை, வெள்ளையரால் கொள்ளையடிக்கப்பட்டு, இங்கிலாந்து மகாராணியின் கிரீடத்தை அலங்கரிக்கின்றன. 

தற்போது, ஜனநாயக நாட்டில், அரசியல் தொழில் செய்வோர், பொன்னாக, பொருளாக வெளிநாட்டில் பதுக்கி வைத்து, பாரத மாதாவை அலங்கோலப் படுத்துகின்றனர். 

கஞ்சன் ஒருவன் இருந்தான். அவன் தன் பணத்தை, தங்கக் கட்டிகளாக மாற்றி, மரத்தடியில் புதைத்து வைத்தான். தினமும் அதை தோண்டிப் பார்த்து, பெருமிதமடைவது அவன் வழக்கம். 

இதை, ஒரு திருடன் பார்க்க நேரிட்டது; கஞ்சன் போனவுடன், தங்கக் கட்டிகளை எடுத்துச் சென்று விட்டான். மறுநாள் வந்த கஞ்சன், தங்கக் கட்டிகள் காணாமல் போனதைக் கண்டு வேதனையுற்று, அழ ஆரம்பித்தான். அப்போது, அந்த வழியே வந்த துறவி ஒருவர், "ஏன்னப்பா அழுகிறாய்' என, விஷயத்தைக் கேட்டார். அவன், கூறினான். 

அங்கிருந்த சில கற்களை எடுத்து அவனிடம் கொடுத்து, "இதை புதைத்து வைத்து, தினமும் பார்த்து ஆறுதல் அடை. அந்த தங்கக் கட்டிகளைக் கொண்டு, எந்த ஆக்கப்பூர்வ காரியமும் நீ செய்யப்போவதில்லை. கடைசி வரை அதை, பார்த்துப் பார்த்தே சாகப் போகிறாய். எனவே, இந்த கல்லும், தங்கக் கட்டியும், உன் அளவில் ஒன்றே' எனக் கூறி விட்டுக் கிளம்பினார். 

வெளிநாட்டில் பதுக்கி வைத்திருக்கும் கறுப்புப் பணத்தால், அதை பதுக்கி வைத்தவர்களுக்கு என்ன லாபம்? மக்களின் சாபம் தான் மிஞ்சும். உப்பில்லா பண்டம் குப்பையிலே என்பர். நேர்மையில்லாத அரசியல்வாதிகளையும் குப்பையில் போட, அரசியல் சாசனத்தில் மாற்றம் செய்யப்பட வேண்டும்.