நம் இந்தியா வல்லரசாகிறது. எதில்?

நம் நாட்டில் எங்காவது ரயில் விபத்து ஏற்பட்டால் உடனே அமைச்சர் விரைந்து சென்று பார்வையிடுவார்.  பத்து லட்ச ரூபாய் இழப்பீடு இத்யாதி, இத்யாதி என பல அறிவிப்புகள் அறிவிப்பார். பயங்கரவாதிகள் தாக்குதல், உயிர்ப்பலி என்றால், 'மிகவும் கோழைத்தனமானது இது அனுமதிக்க முடியாது', இதை நாங்கள் 'இரும்புக் கரம் கொண்டு அடக்குவோம்' என்பார் அமைச்சர். உயிரிழந்தோருக்கு இழப்பீடு, அனுதாபம், ஆதரவு பேச்சு என பல நாடகங்களை அரங்கேறும் .

இரண்டு வாரங்களில் நாம் எல்லாரும் அதை மறந்து விடுவோம். அத்துடன் அடுத்த விபத்து, அடுத்த குண்டு வெடிப்பு நடக்கும் போது மட்டும் தான் , அதைப் பற்றி பேசுவோம்.  இவற்றுடன் புதிதாக இணைந்துள்ள விஷயம் பெட்ரோல், டீசல், கேஸ் விலையேற்றம். கடந்த மே மாதம் ஐந்து ரூபாய் ஏற்றியவர்கள், இந்த செப்டம்பரில், 'மிகவும் கருணை உள்ளத்தோடு' மூன்று ரூபாய் மட்டுமே ஏற்றியிருக்கின்றனர். 

எதிர்க்கட்சியினர் என்ன செய்வார்கள் ஒரு வாரம் கத்திவிட்டு, விட்டு விடுவார்கள்.  நீங்கள் வேண்டுமானால் பார்த்து கொண்டே இருங்கள் . இன்னும் சில மாதங்களில், இந்த பெட்ரோல் விலை, '100' அடித்து விடும். 

காஸ் விலையை, 800 ரூபாய் ஆக்குவதற்கு பலமாக முயற்சிக்கிறார் அத்துறை அமைச்சர் . என்ன விலைவாசி ஏறினாலும் முழுவதும் சகித்துக் கொண்டு அடிமை வாழ்க்கை வாழ்ந்து கொண்டிருக்கிறது நம் நாட்டு நடுத்தர வர்க்கம். இது தான் கடந்த நான்கு வருடங்கலாக பொருளாதார மேதை மண்(ன்) மோகன் சிங் தலைமையில் காங்கிரஸ் அரசு சாதித்தது.

இந்தியா வல்லரசாகிறது. எதில்?