பிரியாணி,குவாட்டருக்காக உங்களை அடமானம் வைக்கபோகிறீர்களா?

தமிழகத்திலுள்ள, உள்ளாட்சி அமைப்புகளின் பதவிக்காலம் முடிவதையொட்டி அதற்கான தேர்தல் அடுத்த வாரம் நடக்க இருக்கிறது . 

இந்த தேர்தலில் போட்டியிடும் வேட்பாளர்கள், பல ஆயிரம், லட்சம் ரூபாய்க்கு, ஏலம் போடுவதாகக் கூறப்படுகிறது.

பல இடங்களில், ஒரு குவார்ட்டர் அல்லது ஒரு ஹாப் , ஒரு பிரியாணி, ஒரு ஓட்டுக்கு குறைந்தது நூறு ரூபாய் கொடுத்து, ஓட்டுகளைப் பெற்று தலைவராக, கடினமாக உழைக்கின்றனர். 

ஆனால், மக்களுக்கு தேவையான மிக முக்கியமான சில அடிப்படை வசதிகளை கூட செய்துத் தருவதில்லை. ஒரு ஊராட்சியின் மாதாந்திர செலவுக்காக, 10 ஆயிரம் முதல், 3 லட்சம் ரூபாய் வரை வழங்கப்படுகிறது. இதை எத்தனை பேர், முழுமையாக மக்கள் நலனுக்காக செலவு செய்கின்றனர்? 

தங்களுடைய வருமானத்தை பெருக்கவும்,  மக்களின் வரிப்பணத்தை கொள்ளையடிக்க வேண்டுமென்ற நோக்கத்துடனும் தான், 95 சதவீதம் பேர், ஊள்ளாட்சித் தேர்தலில் போட்டியிடுகின்றனர் என்பதை நினைக்கும் போது, கிராமங்களின் நிலை மிகவும் பரிதாபமாகவே தோன்றுகிறது.

இனியாவது எந்தவொரு ஊராட்சியிலும் ஆண்டிற்கு சில முறையாவது கிராமசபை கூட்டம் நடத்தவேண்டும் . இல்லையெனில் உடனடியாக அந்த தலைவரை பதவி நீக்கம் செய்ய வேண்டும். அப்போது தான், தலைவரும் திருந்துவார், அவரை தேர்ந்தெடுத்த மக்களும் கொஞ்சமாவது சிந்திந்து ஓட்டளிப்பார்கள்.

இத்தேர்தலில் ஓட்டளிக்க செல்வோர், குவார்ட்டருக்கும், பிரியாணிக்கும் பணத்திற்கும் மயங்காமல், ஊரின் தலையெழுத்தை மாற்றுவதற்கு தகுதியான ஒருவரைத் தேர்ந்தெடுக்க முன்வர வேண்டும்.

அப்போதுதான் கிராமங்கள் ஒளிரும்.