@சிதம்பரம்... இப்போதைய தேவை, பேச்சல்ல, செயல் மட்டுமே?

டில்லியில், 1997 முதல் இதுவரை, 13 குண்டுவெடிப்பு நாசவேலைகள் நடந்துள்ளன. ஆனால், அக்குண்டுவெடிப்பு சம்பவங்களுக்கு காரணமானோர், கண்டுபிடிக்கப்பட்டு கோர்ட்டின் முன் நிறுத்தப்படவில்லை. (செய்தி தினமலர்)

மும்பைத் தாக்குதலில், உண்மையான காவல் துறை அதிகாரிகள், வீரர்கள் தங்கள் இன்னுயிரை தியாகம் செய்து, அஜ்மல் கசாபை உயிருடன் பிடித்தனர். ஆனால், அவன், தீனி போட்டு வளர்க்கப்படுகிறான். 

மேலும், தூக்குத் தண்டனையிலிருந்து, 'ஓட்டு வங்கி அரசியல்' காரணமாக, தப்பி விடுவானோ என்ற ஐயமும் உள்ளது. நம் இன்றைய தேவை, சர்தார் வல்லபாய் படேல் போன்றதொரு திடசித்தம் கொண்ட உறுதியான தலைமை. சிதம்பரம், கபில்சிபல், ராகுல் போன்ற வாய்ச்சொல் வீரர்களும், திக்விஜய் சிங் போன்ற கோமாளிகளும் அல்ல. 

இம்முறையாவது தார்மீகப் பொறுப்பேற்று, உள்துறை அமைச்சர் சிதம்பரம், பதவி விலகவேண்டும்.ஏதோ சிவாஜி ராவ் பாட்டிலை விட, திறமையானவர், உறுதியானவர் என அடையாளம் காணப்பட்டு, உள்துறைக்குப் பொறுப்பேற்ற சிதம்பரம், ஒரு வித்தியாசத்தையும் காட்டவில்லை. 

வழக்கமான பல்லவியாக, 'பயங்கரவாதிகளை வேரறுப்போம், பயங்கரவாதத்திற்கென போராட்டத்தில் வெல்வோம்' என்று, வாய்ப்பந்தல் போடுகிறாரே தவிர, காரியத்தில் ஒன்றும் காணோம்.போதும், போதும் என்றளவுக்கு, மக்கள் கொதித்துக் கொண்டிருக்கின்றனர். 

மக்கள் நலவாழ்வுத் துறை அமைச்சர் குலாம்நபி ஆசாத் வந்த போதும், ராகுல் ஆர்.எம்.எல்., மருத்துவமனைக்கு வந்தபோதும், பாதிக்கப்பட்டோர் கண்டனம் தெரிவித்துள்ளனர். 

இனியாவது ஆளும் பொறுப்பில் உள்ளவர்கள், இப்போதைய தேவை, பேச்சல்ல, செயல் மட்டுமே என்ற உண்மையை புரிந்து கொள்ள வேண்டும்.