பேஸ்புக் விபரீதங்கள் - 25102013

அண்மையில் ஒரு செய்தித்தாளில் படித்தது. பேஸ்புக் மூலம் சில தவறான முகவரிகளை உருவாக்கி பெண்கள் போலவே சில ஆண்கள் போலி ஐ-டி  களை தயாரித்து, சில சபலம் பிடித்த ஆண்களை வீழ்த்தி முடிந்தவரை சுருட்டுவது என்பது தற்போது அதிகமாகி விட்டது. 

டெல்லியில் உள்ள கல்லூரி ஒன்றில் எஞ்சினிரிங் படித்துவரும் மாணவர் ஒருவருக்கே சமீபத்தில்  இந்த விபரீதச் சம்பவம் நிகழ்ந்துள்ளது.

பேஸ்புக்-கில்  அக்கவுன்ட் வைத்துள்ள இவர் நதியா  என்ற ஒரு பெண்ணிடமிருந்து நட்பு வேண்டுகோள் கிடைக்க அதனை ஏற்றார். இருவரும் சிறிது காலம் பேஸ்புக்கில் உரையாடிக் கொண்டிருந்தார்கள்.

ஒரு சமயம் நதியா தன்னை சந்திக்க விருப்பம் தெரிவித்தவுடன் மனிதருக்கு தலைகால் புரியவில்லை.

பொதுவான ஒரு பகுதியில் நதியாவை சந்திக்க இந்த நபர் புறப்பட்டுச் சென்றார்.

மிகுந்த எதிர்பார்ப்புடன் சென்ற அந்த மாணவருக்கு அங்கு அதிர்ச்சி காத்திருந்தது. அங்கு நதியா இல்லை. மாறாக 4 வாலிபர்கள் ஒரு வண்டியில் வந்து இவரை பிடித்து மிரட்டி  ஆயிரம் ரூபாய் பணம், போட்டிருந்த செயின்  மற்றும் செல்பேசி ஆகியவற்றைப் பிடுங்கிக் கொண்டு சென்றனர்.

பேஸ்புக்கில் பேரைக் கண்டும், புகைப்படத்தைக் கண்டும்  ரொமான்ஸ் என்ற பெயரில் ஏமாறாதீர்கள் இளைஞர்களே!