மொபைல் போனால் கெட்டுப்போன பள்ளி மாணவியும், கைதாகிய ஆசிரியையும்...?

அரியலூரில், பள்ளி மாணவி தற்கொலை செய்து கொண்டதற்கு, ஆசிரியை சிறையில் அடைக்கப்பட்டு உள்ளார். அந்த மாணவி, வகுப்பறையில், மொபைல் போனில் பேசியதற்கு, ஆசிரியை கண்டித்துள்ளார். இதனால் மனமுடைந்த மாணவி, தவறான முடிவை எடுத்துள்ளார்.

பள்ளிக்கு, மொபைல் போன் கொண்டு வந்ததோடு, வகுப்பறையில், மொபைலில் பேசியது யார் குற்றம்? 9ம் வகுப்பு மாணவியை, ஆசிரியை கண்டிக்கக் கூடாதா?

பள்ளியில், மொபைல் கொண்டு வர தடையிருந்தும், அதைக் கொண்டு வந்த மாணவி குற்றவாளி தானே? வாங்கிக் கொடுத்து, அதை பள்ளி செல்ல அனுமதித்த பெற்றோரும் குற்றவாளியே. 

ஆசிரியை என்ன மண் பொம்மையா? மாணவர்கள் எதைச் செய்தாலும், பார்த்தும் அப்படியே இருப்பதற்கு? மாணவியரை, அவர்களின் தவறுகளை கண்டிக்கக் கூடாதெனில், பின் ஏன், அவர்களை பள்ளிக்கு அனுப்ப வேண்டும்? வீட்டிலேயே வைத்துக் கொள்ள வேண்டியது தானே...

 தற்கொலைக்கு தூண்டுபவர் என்று ஆசிரியர்களை சொல்வதும், அவர்களை தண்டிப்பதும் பெரிய தவறு. இன்றுள்ள நிலையில், 6வது படிக்கும் மாணவன் கூட, சினிமா, "டிவி' பார்த்து, பஞ்ச் டயலாகுகளை அதிகமாக பேசி, அடங்காமல் இருக்கின்றனர். பெற்றோரே...

ஆசிரியர்களுடன் இணைந்து, உங்கள் பிள்ளைகள் நல்ல முறையில் படித்து, ஒழுக்கத்தில் சிறந்த மாணவர்களாக விளங்க, அவர்களது எதிர்காலம் செம்மையாக மாற, ஆசிரியருக்கு உறுதுணையாக இருங்கள். ஆசிரியர்கள் கண்டிப்பதற்கு இடையூறு இருப்பின், மாணவர்களின் எதிர்காலம், இருண்டு விடும் என்பதை, மறக்க வேண்டாம். நன்றி செய்தி மலர்.